Asuran Movie Review

அசுரன் விமர்சனம் :

கதை :

சிவ சாமியின் (தனுஷ்) இளையமகன் ஓர் கொலை செய்து விடுகிறார் , சிவசாமியும்- அவரது  மகனும் காட்டில் பதுங்குகிறார்கள் , அச்சிறுவன் கொலை செய்யும் அளவுக்கு என்ன நடந்தது , இதிலிருந்து சிவசாமியின் குடும்பம் தப்பித்ததா? என்பதை விவரிப்பதே இந்த அசுரன் !

தனுஷ் :

திருநெல்வேலி அருகே உள்ள கோவில் பட்டியில் ஓர் கிராமத்தில் மனைவி , இரு மகன் மற்றும் மகளுடன்  வசித்து வரும்  சிவசாமியாக   நடை , உடை , பேச்சு என அந்த பகுதி  கதாபாத்திரமாக வாழ்ந்துள்ளார் , முதலில்  தனது குடும்பத்துக்காக மற்றவர்களிடம் இறங்கிப் போவதிலும் , தன் மகனுக்காக இறங்கி அடிப்பதிலும் தன் நடிப்பில்  மிரட்டியுள்ளார் . விருது நிச்சயம்.

மஞ்சு வாரியார் : தனுஷின் மனைவியாக தைரியமான - துணிவான பெண்ணாக நடிப்பில் அபாரம்.

பசுபதி : தனுஷுக்கு மச்சானாக , அவருக்கு உதவும் கதா பாத்திரத்தில் தன் பக்குவப்பட்ட நடிப்பில் கை கொடுத்துள்ளார் .

தனுஷின் மகன்களாக சிதம்பரம் , முருகன் கதா பாத்திரத்தில் நடித்தவர்களின் நடிப்பு  இயல்பு .

 வடக்கூரானாக ஆடுகளம் நரேன், பிளாஷ் பேக்கில் வரும் அம்மு அபிராமி, போலீஸ் அதிகாரியாக பாலாஜி சக்திவேல், வக்கீலாக பிரகாஷ் ராஜ் , மில் அதிபராக வெங்கடேஷ் இன்னும் சில கதா பாத்திரங்கள் சிறப்பான தேர்வு மற்றும் இயல்பான  நடிப்பு .

ஜி .வி . பிரகாஷ் :

கதையுடன் கூடிய பாடல் மற்றும் பின்னணி இசையில் அசத்தியுள்ளார் , குறிப்பாக கத்தரிப் பூவழகி , என் மினுக்கி பாடங்களில் கிராமத்து மணமும் காதலும் , வா அசுரா வா பாடலில் உத்வேகத்துடன் அடித்து கிளப்பியுள்ளார் .

வேல் ராஜ் கேமரா கிராமத்தின் வயல் வெளி , மலை, காடு என்று சுழன்று அப்பகுதி வாழ்வியலை கண் முன்னே கொண்டு வந்துள்ளது .

இரண்டு சண்டை காட்சிகள் என்றாலும் அதை  அதிரடியாகவும் , கிராமத்து இயல்பாகவும் அமைத்துள்ளார் பீட்டர் ஹெய்ன் .

ஓர் கொலை ! அதன் பின்  வாழ மற்றும்  தற்காத்து கொள்ள ஓடுவது  தான் கதை என்றாலும்,  15  வயது பையனை கொலை செய்ய தூண்டிய காரணம் , அதிகார வர்க்கத்தின் அடக்கு முறை, சாதிய வன்மம், நிலத்தின் உரிமை என அத்தனையையும் விவரித்ததில் மற்றும் அந்த வாழ்வியலை காட்சியப்  படுத்திய விதத்திலும்  - பூமணியின் வெக்கை நாவலை மூல கதையாக கொண்டு,  தன்னுடைய பாணியில் சில மாற்றங்களை செய்து  அட போட வைக்கிறார்  இயக்குனர் வெற்றிமாறன் . இதற்கு உறுதுணையாக வசனத்தில் சுகாவும் , திரைக்கதையில் மணி மாறனும் வெற்றிமாறனுடன் பயணித்துள்ளனர் .

மொத்தத்தில் - இந்த அசுரன் :  தனுஷ் - வெற்றிமாறனின் மற்றுமொரு அசுர படைப்பு ! தமிழ் சினிமாவின் மணி மகுடத்தில் மேலும் ஓர் படம் !

(4/5) Asuran Review